Turmush — Бүгүн, 14-апрель күнү Талас районунун Арал айылында грек-рим күрөшү боюнча Азия чемпионатын уткан балбан Таалайбек уулу Афтандилди 300дөн ашык айылдаштары тосуп алышты. Бул тууралуу аймактык кабарчы билдирди.
Маалыматка караганда, иш-чарага президенттин Талас облусундагы ыйгарым укуктуу өкүлү Эрмат Жумаев катышты. Афтандилге кошо анын машыктыруучусу Хаким Махмудов менен балбан Жоломан Шаршенбеков да келди.
Саамалык учурунда Таалайбек уулу Афтандилге Талас районунун акими Байыш Астанакулов «Талас районунун ардактуу атуулу» наамы, ал эми машыктыруучусу Хаким Махмудовго «Каракол айыл аймагынын ардактуу атуулу» наамын берди.
Облус жетекчилигинин атынан балбан менен анын машыктыруучусу Хаким Махмудовго 50 миң сомдук сертификаттар тапшырылды. Демөөрчүлөр Таалайбек уулу Автандилге 5 аргымак тартуулашты.
Буга чейин 7-апрелде Кыргызстандын курама командасынын капчыгына грек-рим күрөшү боюнча Азия чемпионатынан 3 алтын медаль түшкөнү кабарланган. Акжол Махмудов үчүн бул алтын карьерасындагы төртүнчү жеңиш болду. Ал эми Афтандил Таалайбек уулу менен Асан Жанышов чоңдор арасындагы Азия чемпионатында биринчи жолу чемпион аталды.
23 жаштагы Афтандил Таалайбек уулу көп жылдан бери Хаким Махмудовдун кол алдында машыгып келет. Ал «UWW» уюмунун алдындагы расмий мелдешке алгач 2019-жылы Казакстанда өткөн өспүрүмдөр арасындагы Азия чемпионатында катышкан. Бирок анда биринчи эле беттешинде жеңилип калган. Ошондон кийин көпкө чейин улуттук курамага кирбей жүргөн.
2023-жылы ал Бишкекте өткөн рейтингдик турнирге катышып, 60 кг салмакта 5-орунду ээлеген. Коло медаль үчүн беттеште утулуп калган. 2024-жылы Кыргызстандын чемпионатында 63 кг салмакта финалга чейин жетип, 2-орунду алган. Андан кийин Түркияда өткөн «Яшар Догу» турниринде коло медаль тагынган.
2026-жылы Кыргызстандын чемпионатында 3-орунду, Албаниядагы рейтингдик турнирде 7-орунду ээлеген. Балбанга Бишкекте өтүп жаткан Азия чемпионатында 63 кг салмакта күрөшүү мүмкүнчүлүгү берилди. Мелдеште ал алгач Япониядан келген спортчуну жеңди. Андан кийин Түркмөнстандын балбанын мөөнөтүнөн мурда утуп, финалга чыкты. Чечүүчү беттеште Таалайбек уулу Ирандан келген 21 жаштагы атаандашын 7:2 эсебинде ишенимдүү жеңип, карьерасында биринчи жолу Азия чемпиону болду.
Жеңиштен кийин Афтандил өзүнүн 88 жаштагы машыктыруучусу Хаким Махмудов менен бирге Кыргызстандын туусун көтөрүп чуркады.
Хаким Махмудов дагы бир Азия чемпионун тарбиялады. Ал буга чейин Жанарбек Кенжеевдин чемпион болушуна салым кошкон, ошондой эле бала кезинен Олимпиаданын коло байге ээси, дүйнөнүн эки жолку жана Азиянын үч жолку чемпиону Жоламан Шаршенбековду тарбиялаган. Азыр Хаким Махмудов машыктыруучу катары ишин улантып, эки топту — балдар жана чоңдор тобун жетектеп жатат.
